O resumo das notícias do Vaticano em latim: o convite do Papa para rezar pela paz durante o mês de outubro, especialmente participando no Terço no dia 11; a Audiência Geral de quarta-feira; e a catequese.
“HEBDÓMADA PAPAE”
NOTÍTIAE VATICÁNAE LATÍNE RÉDDITAE
Die vicésimo séptimo mensis Septémbris Anno Sancto bismillésimo vicésimo quinto
TÍTULI
Die undécimo mensis Octóbris apud Petriánum Forum rosárium dicéndum pro pace praestítuit Leo quartus décimus Papa, qui ínsuper fidéles adhortátur eódem toto mense ad pacem deprecándam.
Audiéntiae Generális témpore, die Mercúrii, Leo quartus décimus osténdit quómodo Sábbato Sancto mortem ingréditur Christus, hómines, némine excépto, redemptúrus.
Salútem plúrimam ómnibus vobis Latínum sermónem auscultántibus impértit Xavérius Sartre.
NOTÍTIAE
Audiéntiae huius Generális sub finem precatiónis incéptum nuntiávit Leo quartus décimus Papa, quo die Ecclésia sanctum Ioánnem vicésimum tértium recordátur aeque ac Concílii Vaticáni secúndi incoháti anniversárium. Summus Póntifex totum per Octóbrem mensem pro pace orábit. Refert Rosárius Tronnolone.
Fidéles qui mense Octóbri ad orándum pro pace inducúntur, ii útique a Leóne quarto décimo die undécimo eódem mense impénse invitántur ad peculiáre rosárium in Petriána Plátea dicéndum, quod in Iubilǽi vigília Mariális spiritalitátis agétur. Ante Basílicam Beátae Maríae Vírginis Fatiménsis próprium locábitur simúlacrum, signum nimírum quod “spes non confúndit” (Rom 5,5). Omnes est cohortátus Póntifex ut Iesu amórem déferrent qui illúminat ac súblevat huius témporis humánum genus, inter ódii ruínas quod ad intéritum rédigit. Ex hoc incépto, sémitam sancti Ioánnis Páuli secúndi necnon próximi decessóris sui Francísci calcat Leo quartus décimus, qui plúries pro pace rosárium recitávit. Continénter Pontífices pro pace conciliánda oravérunt, quae iustítia nítitur.
Die Mercúrii vicésimo quarto mensis Septémbris catechésis sériem de Pascha Iesu prodúxit Leo Papa quartus décimus. Epíscopus Románus suas cogitatiónes in consequéntem diem Christi mortis convértit, quo ábditus salútis actus perfícitur. Refert Alexánder De Carolis.
Sábbato Sancto silens amplexátur Christus et cunctum creátum Patri osténdit, quod in eius salútis consílio rursus ponátur, áutumat Leo quartus décimus. “Excélsius quiddam et extrémum Dei in hómines amóris exstat. Si Iesus “usque eo descéndit, nihil a redemptióne dístrahi potest”, addit Leo Papa, neque “nostrae noctes”, neque “nostrae vetustíssimae culpae”, neque “nostra revúlsa víncula”. “Cum Deus descéndit, Is non profligátur, sed Eius amor complétur. Non est detriméntum quoddam, sed via qua Ipse demónstrat néminem nimis longe versári, nullum cor nimis cláudi, ob eius amórem”, explicávit Póntifex. Eo quod Christus in illo abýsso nos attíngit, qui sunt ínferi, id secum fert Dei humilitátem prae peccáto nostro non sístere.
NOTÍTIAE BREVÍSSIMAE
Audiéntiae Generális sub finem, urbis Béthleem praeféctum Leo quartus décimus salutávit. Hic christiánus nempe nonnúllos menses munus gerens, Summo Pontífici explicávit quantum iuváret si áliquid susciperétur, quod ad Palaestínam et Gazam spectat ut Terrae Sanctae vivi lápides servéntur.
Arce Gandúlfi, die Martis vésperi, edíxerat Póntifex Palaestínae Statum ágnitum “iuváre posse, áttamen hoc témpore ex áltera parte audiéndi voluntátem haud reperíri: ideo nunc diálogus abest”.
Haec dicénda putávimus; próximo sábbato rursus ad vos. Valéte!
Fonte: Vatican News
